Vil du vere med og byggje festival i fjellheimen? Bli med på sumarens kjekkaste eventyr saman med oss, og meld deg som frivillig på Vinjerock!

Sist oppdatert 10. april 2025

Meld deg som frivillig

OBS! Når du søkjer som frivillig aksepterer du automatisk frivilligkontrakten vår. Trykk HER for å lese igjennom.

Å vere frivillig på Vinjerock er å vere ein del av fellesskapet. Saman lagar me festival, og då er det fort gjort at ein får nye vener. Du kan trygt melde deg som frivillig åleine og vite at me kjem alle til å ta godt vare på deg! Du treng korkje ha erfaring eller kunnskap frå før for å vere frivillig. Me stiller med naudsynt opplæring der det trengs. 

Du er sjølvsagt velkomen som frivillig på Vinjerock om du har ei funksjonsnedsetjing, og kan nytte søknadsskjema som alle andre. Ta gjerne kontakt med frivilligsjef Ane Skaare Tveiten om du har spørsmål. 

Me prøver alltid så godt me kan å oppfylle ynskja dine om vakter eller kven du vil jobbe saman med. Men me kan diverre ikkje love at alle ynskjer blir oppfylde. Vinjerock er eit fellesskapsprosjekt kor me saman jobbar for at alle skal ha den beste opplevinga, og det kan nokre gonger bety at me må stille opp og hjelpe til i andre grupper enn der me i utgangspunktet er plassert. På den måten kan alle ha det kjekt. 

Me ynskjer alle velkomne som frivillig hjå oss, uavhenging av kvar du kjem ifrå eller kven du er. Me håpar at både lokale og langvegsfarande melder seg som frivillige, slik at me saman kan gjere årets Vinjerock til nok ei uforgløymeleg oppleving i fjellheimen for oss alle! 

Når kan eg forvente å få svar?

Etter at søknadsskjemaet er publisert vil gruppeleiarane jobbe fortløpande med å behandle søknadar, men svar-tid kan variere noko sidan dei óg er frivillige. Du får ein e-post så snart dei har fått sett på søknaden din! 

Artistvert

Nokon må ta vare på dei flotte artistane våre. Som artistvert er du kontaktperson mellom artist og Vinjerock den dagen artisten spelar. Di oppgåve er å passe på at dei som vitjar festivalen har det kjekt når dei er på vitjing hjå oss. Du skal gjere klar garderoben deira, hjelpe til med å halde backstage ryddig heile dagen og syte for at artisten kjem seg dit hen skal overnatte (med hjelp frå transportavdelinga). Artistvertane hjelper óg til i artistrestauranten vår, og med opp- og nedrigging av backstage. 

Barmedarbeidar

Erfaring seier at fjellufta gjer folk ekstra tyrste, og me treng nokon med godt humør til å tappe festivaløl og andre gode drikkevarer. Her trivst ein godt om ein likar å kjenne på pulsen til festivalen, møte folk med eit smil og yte god service. Har du erfaring frå før er det topp, men definitiv ikkje naudsynt eller eit krav. Det viktigaste er at du har stå-på-villje og godt humør! 

OBS: Om du ynskjer å vere med i denne gruppa må du skrive inn personnummer når du fyller ut skjemaet. Det blir berre brukt til å føre personallister.

Bussvert

Har du ei positiv haldning, er serviceinnstilt og likar å prate med folk, er dette noko for deg. Denne gruppa syt for å ta godt imot festivaldeltakarane når dei kjem på parkeringa, og gjev dei ein flott tur inn til festivalområdet. Om du i tillegg likar å prate i mikrofon vil me gjerne ha deg med som guide på skyttelbussane inn til Eidsbugarden, eller som bussvert på festivalekspressane som går t/r Oslo, Sandvika, Bergen og Trondheim. 

Fjellkokk

Svoltne fjellfolk treng ordentleg mat! Som fjellkokk på Vinjerock får du jobbe med fantastiske råvarer frå Valdres, ta imot bestillingar og servere saman med ein skikkeleg kjekk gjeng der latteren sit laust. Har du erfaring frå før er det topp, men definitivt ikkje eit krav. Me er mest opptekne av at du er like glad i god mat som oss, og best av alt - frå kjøkkenet har du utsyn over heile festivalområdet. 

OBS: Om du ynskjer å vere med i denne gruppa må du skrive inn personnummer når du fyller ut skjemaet. Det blir berre brukt til å føre personallister.

Foto og film

Er du fotograf eller berre ein veldig ivrig amatør? Me treng flinke folk til å fange den unike Vinjerockstemninga, både på fjellturar, konsertar, samtaler, i camp og på festivalområdet. Gjengen på foto og film dekkar festivalen gjennom stillbilete og filmsnuttar. Fortel gjerne litt om bakgrunnen din, og kva du kan tenkje deg å dokumentere. Me set òg stor pris på om du kan vise til tidlegare arbeid du har gjort, slik at me får eit inntrykk av kva du er drivande dyktig på.

Du må stille med kamera/utstyr sjølv; me stiller med låsbare skåp og lademoglegheitar på festivalområdet. Fint om du også spesifiserer i søknaden om du er mest interessert i å jobbe med foto eller film.

OBS: Avgrensa plassar.

Info og krambu

Om du liker å hjelpe folk kan du sjå hit! I Info og Krambu kan me hjelpe til med det meste. Om festivaldeltakarane har eit spørsmål, har mista soveposen sin eller vil kjøpe festival-merch, er du personen dei kjem til, så eit løysingsorientert sinn med sans for salsutstilling er ein uslåeleg kombinasjon.

Miljøarbeidar

Vinjerock går føre seg i fjellheimen, det er derfor ekstra viktig at avfallet frå festivalen vert handtert på ein god måte. Slik at me kan arrangere festival utan å setje store avtrykk korkje i nærområdet eller på kloden vår.
Under festivalen:
Avfallshandtering er ein av dei viktigaste jobbane du gjer som frivillig på miljø. Då bidreg DU til at Vinjerock kan vere ein av Noregs mest miljøvenlege festivalar! På miljøgruppa er du ute i all slags vêr, og du arbeider alltid i grupper med trivelege folk.
Opprigg og nedrigg:
Me treng også frivillige før og etter festivalen til å rigge infrastrukturen til miljøgruppa opp, og for å pakke alt saman ned etter endt festival. Her trengst det folk med praktisk sans, pågangsmot og godt humør, som ikkje er redde for å arbeide lange dagar. 

Skriv kva ferdigheiter du har, og om du kan arbeide veka før eller etter festivalen.

Område/infrastruktur

Vinjerock treng dyktige folk for å laga eit bra festivalområde. Områdegjengen byggjer opp festivalområdet før festivalen, og riggar det ned når festivalen er over. Her trengst det folk med godt utvikla praktisk sans, pågangsmot og godt humør, som ikkje er redde for å arbeide lange dagar. Det er óg behov for mannskap som står for vaktmeistertenester under sjølve festivalen.

Skriv inn kva du kan og kvifor du vil vere med. Det er óg ein fordel om du skriv om du kan stille i veka før eller etter festivalen.

Sanitet

Som sanitetspersonell blir du ein uvurderleg ressurs for alle som vitjar festivalen. Me tek vare på alle, om det så berre gjeld gnagsår, bankande hovudverk eller overtråkk. Krav til alle søkjarar er at dei må vere ferdig utdanna sjukepleiarar eller legar. Om du er lege må du vere ferdig med LIS 1 og ha lisens for å jobbe som lege i Noreg.

Scenearbeidar

Scene, lyd og lys skal riggast opp før festivalen – og ned etter festivalen. Under festivalen hjelper du til på scena under og mellom konsertane for at programmet skal gå så knirkefritt som mogleg.

Oppgje kva vakter du er interessert i:

  • Opprigg + nedrigg : Arbeid tysdag og onsdag før festivalen + nedrigg på sundag
  • Ei tidleg vakt og ei sein vakt under festivalen + nedrigg på sundag

Solskinspatrulje

Solskinspatruljen er for deg som er glad i folk, smiler meir enn gjennomsnittet og trivst med å gjere andre betre! Solskinspatruljen sin oppgåve er å vere dei frivillige sine frivillige. Me skal syte for at alle dei frivillige på Vinjerock har det bra, får seg ein kopp kaffi og ein banan og held stemninga oppe 24/7. Dette er nok det trivelegaste du kan gjere som frivillig! #kosaseg

Transport

Det er mykje varer, utstyr, artistar og folk som skal fraktast til og frå når ein arrangerer festival høgt til fjells. Transportgjengen syter for at alt og alle kjem dit dei skal vere og at logistikken går saumlaust. Søkjarar med førarkort klasse D1, D1E og BE blir prioritert. Vêr snill og oppgje førarkortklassar i søknaden.

Om du ikkje har førarkort kan du vere med som parkeringsvakt, innkøyringsvakt, områdevakt som passar på at veg og område er i orden, eller hjelpe til med bussavviklinga. I transportgjengen treng me òg parkeringsvakter og bagasjestablarar, som vil vere publikum sitt fyrste og siste møte med festivalen. 

Ordens- og trivelsvert

Tryggleik består av orden- og trivselsvakter. Deiras oppgave er at publikum skal ha det fint på festivalen. Trivselsvakter går rundt i campområdet og sjekkar at folk har det bra. Dei svarar på spørsmål og deler ut litt solkrem, eit gnagsårplaster eller søppelposar om du treng. 
Ordensvakter har oppgåver på festivalområdet og sjekkar festivalarmbånd og akkreditering, og hjelp til med å overholde skjenkereglene. Ein treng ikkje ha vekterkurs eller liknande for å være ordensvakt, ein kjem langt med godt humør og litt tålmodighet. 

OBS: Fordi politiet vil sjekke vandelen til vaktene må dei som ynskjer å vere med i denne gruppa skrive inn personnummer når dei fyller ut skjemaet.

Frivilligskjema 

Som frivillig får du, i tillegg til å oppleve Noreg sin vakraste festival utan å betale eit raudt øre:

  • Festivalpass (dette får du inne på festivalområdet)
  • Moglegheit til å vere med på Vinje Rockehøgskule (ei helg i juni der me blir kjent, lærer og har det kjekt i vakre, vene Vang i Valdres)
  • Eit måltid medan du er på vakt under festivalen
  • Litt godsaker frå festivalen sine partnarar
  • Ei unik frivillig-T-skjorte
  • Gratis transport t/r Tyin–Eidsbugarden (på oppsette tidspunkt)
  • Rabattert parkering på Tyinkrysset. Me oppmodar dykk til å fylle bilen med fleire vinjerockarar eller ta kollektivtransport då det er avgrensa med parkeringsplassar.
  • Garantert nye, kjekke vener for livet

Har du spørsmål eller er usikker på kva gruppe som passar for deg? Fyr av ein e-post til frivilligsjefen Ane Skaare Tveiten på e-post frivillig@vinjerock.no.

NB! Aldersgrensa for å vere frivillig på Vinjerock er 18 år.