Ølvøtt-pakkene utseld på 10 minutt!

Publisert 09. desember 2009 kl 00:01 av Eirik Høyme Rogn

Det er heilt tydeleg at erfarne Vinjerockarar har merka seg behovet for ein god ølvøtt, for når salet byrja klokka ti i dag var det mange om beinet. Det vil seie; salet skulle opna klokka ti, men på grunn av enorm trafikk byrja serveren vår å hyperventilere, og det meste gjekk beint åt skogen ei lita periode.

Men det er utruleg kva som går seg til. Etter ei lita intensiv periode med kjærleik og oppmuntring, samt litt påfyll av energikjeks (les: minne), så var serveren på ny klar til dyst - og denne gongen gjekk det langt betre! I løpet av ti minutt var alle ølvøttane borte vekk, og i dagane som kjem legg julegåver frå Aasmund på veg ut til heile Noreg - frå Fauske i nord til Kristiansand i sør :-)

Om du var blant dei som trykka forgjeves utan å kome nokon veg kan vi trøste med to ting: Det ordinære billettsalet byrjar om eit par månaders tid, og om du får tak i ein billett der så kan du strikke din eigen ølvøtt i Aasmunds strikkepub til sumaren! Då stiller nemleg Vinjestrikkarane opp for å lære bort sine kunster til strikkehungrige fjellrockarar.

Vi sjåast til sumaren - ha ei framifrå adventstid så lenge :-)