Velkomen attende til festival-Valdres!

Publisert 04. november 2009 kl 18:21 av Eirik Høyme Rogn

Valdres er Noregs mest tettpakka og varierte festivalregion, og om du lengtar attende byr november på både matopplevingar og verdseliten på ski!

Fyrst ute er Norsk Rakfiskfestival, som går av stabelen på Fagernes no til helga. Erkenorsk mattradisjon krydra med folkefest og musikk står på agendaen, og på programmet i Storteltet finn du blant andre gamle Vinjerock-travarar som Strandingarna og CC Cowboys! Heile 25.000 forvillar seg til Fagernes denne novemberhelga, og vi kan love at du får ei festivaloppleving du seint vil gløyme.

Helgene etter brakar det laus på Beitostølen. 13.-15. november går Beitosprinten av stabelen, med landets elite innan langrenn og skiskyting på medaljejakt i løypene. Helga etter er det World Cup-opning i dei same løypene, og det er ikkje ofte eit slikt stjernegalleri er samla i bygde-Noreg.

Vi håpar å sjå deg i Valdres i vekene som kjem!