Besøksrekord på opningsdagen

Publisert 31. juli 2009 kl 13:32 av Eirik Høyme Rogn

Vinjerockarar let seg ikkje stoppe av ei regnskur eller tre! Aldri tidlegare har det vore så mange på opninga av Vinjerock. Sjølv om Jotunheimen viste vrangsida torsdag kveld, så var stemninga skyhøg i den stappfulle storlavvoen.

Omlag 1900 publikummarar trassa regn og ein litt småsur vind. Som løn for strevet fekk dei høyre lågmæld pop frå Petter Carlsen, og ein drivande konsert med El Cuero, eit band som spelar det dei sjølve kallar ”stratosfærisk og skitten powercountry”.

I dag, fredag, tek festivalen til for alvor, med aktivitetar og konsertar frå tidleg på dagen. Festivalprogrammet er rett nok litt forandra på grunn av dei utrygge vermeldingane. Dei mest spektakulære fjellturane må setjast ut, og fjelltoppkonserten med Valkyrien Allstars blir  flytta frå fjeltoppen Utsikten til scenen på Eidsbugarden.

I kveld skal veret letne, og i morgon lovar meteorologane godver. Tre tusen entusiastiske festivaldeltakarar gler seg til resten av helga!

Foto: Iris Engen Skadal/Vinjerock.