Vinjerock best på Fairtrade!

Publisert 27. januar 2010 kl 20:51 av Eirik Høyme Rogn

I dag fekk vi ei real gladmelding frå Fairtrade Max Havelaar Norge: Vinjerock er kåra til årets Fairtrade-festival 2009!

Vi skal ikkje legge skjul på at vi er bittelitt stolte av dette, og det gjer oss ikkje mindre gira på å arbeide vidare med Fairtrade-produkt i fjellheimen. På lag med Fairtrade-gjengen i Noreg har vi mellom anna skipa Aasmunds Kaffebar, der heile overskotet i fjor gjekk uavkorta til sykkelgutta i Kapp til Kapp.

Ved sidan av dette har vi nytta Fairtrade-merka produkt i all mat der det har vore mogleg, og vi har inntrykk av at vårt kjære publikum set stor pris på å få god mat med rettferdige råvarer. Vonleg har det også vore triveleg å vakne opp til ein pose med Fairtrade-stæsj utanfor teltet for einkvan :-)

Vi ser fram til ein ny sumar med fruktbart Fairtrade-samarbeid. Og dersom vi skal tru på nokre av ryktene vi har høyrt nyleg så kan du vente deg mykje nytt snadder i år - i tillegg til alt du kjenner frå før!

Les meir på fairtrade.no.