Dagens artistslepp: Skambankt

Publisert 17. desember 2009 kl 11:49 av Eirik Høyme Rogn

Jeppda! Breibeint tungrock frå Jæren er dagens førjulsgåve frå oss til deg (og litt til oss sjølve òg). Skambankt hoppar i fjellskoa og tek den lange ferda til Eidsbugarden fredag 23. juli 2010!

Historia byrja allereie i 1994, då bandet vart starta ved ei tilfeldigheit for å erstatte eit band som ikkje kunne stille på ein konsert. Gjengen i Skambankt tromma saman nokre låtar på rekordtid, og gjorde sin fyrste konsert. Etter dette vart det nokre sporadiske spelejobbar eit års tid, før dei ga seg i 1995.

Ti år seinare var det derimot fart på sakene igjen, og debutalbumet Skambankt kom i 2004. Skambankt hadde no vorte eit sideprosjekt for frontfigur Terje, som også speler i Kaizers Orchestra. Sidan den gong har det kome to nye album; Eliksir i 2007 og Hardt Regn i 2009.

Og det viktigaste av alt: Vi snakkar om eit fantastisk liveband! Skambankt gjev deg akkurat passe mykje trøkk i magen, akkurat passe mykje rykk i rockefoten, akkurat dei rette riffa som festar seg i hjernebarken. Oppsummert: Akkurat det du treng for ein framifrå festivalkveld på Eidsbugarden!

Då er vi snart ferdige med denne veka... følg med i morgon :-)

#3

Eirik

29-12-2009 19:08

Kremt... godt poeng :-)

#2

Ragnhild

29-12-2009 19:03

Fredag 22. juli 2010 eksisterer ikke. Er det torsdag 22 eller fredag 23 dere mener?

#1

Trygve

21-12-2009 10:23

Skambankt i fjellheimen blir så enormt bra!