Gåte kjem til Jotunheimen!

Publisert 12. desember 2009 kl 07:00 av Eirik Høyme Rogn

Endeleg har vi fått det til! Høge tindar, trolske jotnar og fjellsko var formelen som måtte til for å få lokka Gåte attende på scena. Laurdag 24. juli 2010 skal dei trollbinde publikum på Eidsbugarden!

Gåte var det fyrste bandet vi drøymte om å få sjå på Eidsbugarden, men dessverre la dei instrumenta på hylla før vi skreiv det fyrste kapittelet av vår festivalhistorie. I haust greide derimot studentfestivalen UKA i Trondheim å få samla dei til ei gjenforening, og det med kjempesuksess. Ikkje berre var publikum tilfreds, men også bandet hadde funne tilbake til den gamle kjemien, og etterpå byrja dei å fable om å gjere ein mikroskopisk sumarjobb i 2010.

– Når vi sat og tenkte over dette var Vinjerock den fyrste festivalen vi noterte på blokka, fortel bandets manager Per Tronsaune. – Vi gler oss rått til å spele midt i Jotunheimen, blant dei kolossale kulissane som jotnane sjølv skapte.

Vi kan bekrefte at det er fleire enn berre bandet som ser fram til dette. For oss i festivalleiinga er dette ein draum som blir realitet, og vi gler oss infernalsk til å stå saman med dykk alle framfor scenekanten til ein og ein halv magisk time i fjellnatta!

Og for å feire denne fantastiske førjulsgåva har vi bestemt oss for å sleppe namnet på ein ny artist kvar dag i neste veke. Gled dykk :-)

Billettsalet startar i dag klokka 10:00!

#1

Huldra

21-12-2009 13:16

Jaaa :D Dette blir så fantastisk bra... Gåte i Jotunheimen!