Staut

Med ein hitsingel om ei jente vokalisten kapra på Vinjerock, er det sjølvsagt at Staut skal spela på Eidsbugarden.

- Du veit eg skulle på fjelltur under Vinjerock for eit par år sidan, men den turen enda i eit telt borti campen. Det meinte Ørnulf, som er ordsmeden i bandet, var ei god historie å skrive låt om, ler vokalist Gaute Ausrød.

Og låt vart det.

”Vallersbrur” har summa på FM-bandet i heile vinter, og gjort mang ein Vinjerockar varm om hjarta. For når sant skal seiast, er han ikkje den einaste som har enda turen ein annan plass enn fyrst planlagt på festival i Jotunheimen.

Med begge føtene godt planta i Valdres har Staut byrja å leggje Noreg under seg det siste året. Våpenet er snedige og humoristiske tekstar på Valdresdialekt, følgt av eit lydbilde i skjeringa mellom rock, pop og folkemusikk. Med seg på vegen fekk dei òg yatzy i femmarar frå anmeldarstanden for plata ”Staut” som dei sleppte no i vår.

- Vi dreg på med mykje frå Staut-plata sjølvsagt, men vi har og øva inn eit par nye låtar til Vinjerockhelga, fortel Gaute.

Han forsikrar oss om at dei kjem til å glise frå øyre til øyre når dei går på scena, og at dei skal gjera sitt aller kvassaste for å syte for Vinjerockstemning på sitt mest intense.

Vi  ser starten på eit eventyr på ekte Valdresvis. Og vi gler oss til å sjå kvar fjellturen endar dette året for ”Staute-Gaute” og resten av gutane i Staut…

(Og ja, det er same Gaute som avslutta fredagskvelden under fjorårets festival. Altså ein Vinjerockar god som gull!)