- Vinjerock er lagt til eit av landets vakraste naturområde, i utkanten av ein nasjonalpark. Dette medfører eit stort ansvar for å ta vare på miljøet. Fordi vi gjerne vil halde fram med Vinjerock i mange år er det utruleg viktig at Vinjerockarane hjelper oss å bevare Eidsbugarden som den naturperla den er, og sikrar framtida for både Eidsbugarden og Vinjerock, seier Marit.

Det er lagt ned eit betydeleg arbeid for å gjera Vinjerock til ein miljøvennleg festival. Vinjerock er no sertifisert som Miljøfyrtårn, noko miljøsjefen er svært stolt av.

- Men det at vi er eit Miljøfyrtårn stiller også ekstra store krav til oss som festival, fortel Marit.

Frå seint til tidleg går dei fantastiske miljøarbeidarane rundt på festivalområdet og ryddar opp eller bistår deg om du lurer på kor du skal gjera av søppel og pant.

- Dei er stort sett trivelege, så ta godt i mot dei, oppfordrar miljøsjefen.

Søppelposar med fargekodar

På Vinjerock sorterar vi søppel etter fargar, og på bussen inn til Eidsbugarden får du utdelt søppelposar du kan ta med deg til campen din.

Raudt = pant, grøn= matavfall, svart = restavfall og kvit = plast.

Går du tom? Stikk innom serviceteltet på Eidsbugarden og få fleir. Posane kan du kaste på miljøstasjonen som du finn mange stader i campane og på festivalområdet eller levere til miljøarbeidarane som traskar rundt!

Kva skal eg gjere som Vinjerockar på Eidsbugarden?

Her følgjer ei lita liste over kva du skal og IKKJE skal gjere for å hjelpe oss i miljøarbeidet.

Du skal:

• IKKJE ta med eingongsgrillar og glasflasker på festival, det er heilt forbode!
• Ta med deg heim det du tek med deg inn til Eidsbugarden (til dømes telt og campingstolar)
• Ikkje kaste ølglaset ditt på bakken, finn eit lilla skilt og kast det der.
• Sortere søpla di, både i campen og på festivalområdet. Fargekodane er lette å følgje :-)

Kva kan eg som Vinjerockar gjere for miljøet?

Har du lyst til å yte det «vesle ekstra» for miljøet på veg til Vinjerock? Her er nokre heite tips på kva du kan gjere:

• Ta Ubekymrabussen
• Fyll opp bilen (bruk Facebook-sida vår om du manglar haikepartnar/treng skyss)
• Gå! Det er mange flotte ruter inn til Eidsbugarden.
• Tråkk deg inn på to hjul. Vi har flotte sykkelstativ som ventar på deg (kom gjerne tidleg om du skal sykle, det vil være mykje trafikk på vegen mellom Tyin og Eidsbugarden både før og under festivalen). 

Sjølv om dette kanskje blei mykje informasjon er miljøarbeidet på Vinjerock eigentleg ganske enkelt i følgje miljøsjefen.

- Om du er ein ekte Vinjerockar som ryddar og sorterar får du gjerne ein klem. Er du ein noldus som let det vera og eg finn det blir det kjeft.. Eg er mest glad i å gi frå meg klemmar!