Fyrste bod: Hugs festivalpass!

Dette er strengt tala det viktigaste av alt. Hugs det (samt legitimasjon)! Utan billett kjem du ikkje inn. Vi kan dessverre ikkje hjelpe deg, sjølv om du får nokon til å sende deg eit bilete av billetten der han heng heime på kjøleskåpsdøra...

Pakkeliste

Mang ein Vinjerockar har vore både våt og kald før deg, men om du hugsar alt dette skulle du ha dei beste føresetnader for å vera både turr, varm, mett og glad når dagen er omme.

Ting du absolutt bør hugse å ta med deg:

• Legitimasjon (og evnt. gyldig medlemskort hjå DNT om du har rabattert billett)
• Betalingskort (du kan betale og kjøpe bongar med kort overalt, så legg gjerne att sedlane heime)
• Ein hundrelapp (kontant), dersom du har bil og skal parkere
• Kart og kompass om du skal ut på tur
• Reiseradio (slik at du kan høyre på VinjeFM mellom slaga)
• Godt humør & feststemning!

Og når det gjeld klede og utstyr så er eit godt tips: Ull er gull! Ta med klede for all slags vêr. På Eidsbugarden får du nemleg ofte bikinivêr og boblejakkevêr i løpet av eit døgn. Her er ei potensiell pakkeliste:

• Ullundertøy (eit par lag)
• Fjellstøvlar (og kanskje gummistøvlar om det blir vått/gjørmete)
• Joggesko
• Ullføsslo (ullsokkar)
• Vindtett fjellbukse/jakke
• Solkrem & solbriller
• Shorts (eller bikini)
• Sokkeskift (om du trur du har nok, ta eit par til)
• Tjukk høghalsa genser/fleece/anna mellomlagsplagg
• Lue og vottar
• Regntøy (eller noko anna som held vatnet unna)
• Godt liggeunderlag og god sovepose (kanskje også lakenpose/jervenduk)
• Stol/krakk
• Hovudlykt (det kan bli mørkt ute i bushen)
• Stødig telt
• Toalettsaker
• Handkle
• Myggspray
• Ølvott (altså ein vott til handa du held ølen med)
• Primus/kokeapparat og brennstoff
• Termos

Sjekk gjerne vêrmeldinga før du legg i veg, så har du ein peikepinn på kva du treng (sjølv om den erfaringsmessig aldri slår heilt til)...

Parkering og festivalbuss

Grunna for liten parkeringskapasitet på Eidsbugarden, samt eit sårbart vegnett, må alle gjester parkere på festivalparkeringa på Tyin. Denne ligg attmed innkøyrsla ved Tyin Panorama og har haldeplass for festivalbussar. Parkeringsplassen har vakthald heile helga. Pris for parkering er kr. 100,- for heile festivalen. Vang Fotballklubb står for vakthald og får inntektene frå parkeringa. NB: Kontant betaling!

Dersom festivalparkeringa på Tyin blir full, vil det bli skilta til alternativ parkering ved Joker på Tyinkrysset. Det vil då òg bli sett opp bussar frå dei alternative parkeringane og inn på Eidsbugarden. Vi oppmodar alle som har høve til det om å nytte kollektivtransport/køyre saman også opp til Tyin, for å minske belastninga på parkeringsplassane i området.
Rutetider for festivalbussen finn du her. NB: Du må vise billetten din + legitimasjon før du kan gå ombord på festivalbussen.

Byting av billett i armband

Når du kjem til Eidsbugarden kan du byte papirbillett mot armband ved inngangen til sjølve festivalområdet. NB! Hugs legitimasjon og evt. medlemsprov frå DNT (har du medlemsbillett utan å kunne syne medlemskort må du betale mellomlegget på kr. 300,-).

Om du kjem til Vinjerock som akkreditert eller frivillig kan du gå til Serviceteltet for å få på deg armband.

Servicetelt Eidsbugarden

Serviceteltet på Eidsbugarden er bemanna med infovertar som kan gje deg svaret på det meste du lurer på. Veit dei det ikkje sjølve gjer dei kva dei kan for å finne den rette å spørja. Innsjekking for friivllige er også i dette teltet.

Opningstider:

• Torsdag: 10- 03
• Fredag: 10-03
• Laurdag: 10-03
• Sundag: 09-14

Dyr på festival

Det er tillate med hund i campen, så lenge den ikkje er til sjenanse for andre gjester. Hugs bandtvangen og sørg for at dyret ditt alltid er ivareteke (har mat, drikke, ly for vêret og ikkje blir sett att åleine i lange periodar). Ditt dyr er dit ansvar!

Det er ikkje tillate med hund inne på festivalområdet, og heller ikkje på festivalbussen grunna allergihensyn. Ved behov kan eige transport for dei firbeinte kjøpast for kr. 200,- pr. tur/pr. dyr. Bestill transport i god tid frå transportsjef Endre Vik på tlf. 416 98 782.

Ungar på festival

Ta gjerne med ungane om du ynskjer det. Aldersgrensa på festivalen er 16 år, men ungar under 16 år slepp inn i følge med føresette. Ungar under 12 år har gratis inngang i følge med føresette.

Har du med borna og skal campe? Set gjerne teltet ditt opp eit stykkje unna alle andre, ivrige Vinjerockarar har ein tendens til å lage lyd langt ut i dei små timar, og born skal helst sove om natta. Hugs å passe på høyrselen til dei minste (bruk hørselsvern som Peltor Kids eller liknande) slik at dei framleis kan nyte lyden av Vinjerock om 20 år!

Mat og drikke

Matpakka kan du legge att heime. Vi har rikeleg med mat, god mat! Og det beste av alt er at den ikkje kostar skjorta heller. Klikk her for å sjå årets meny og opningstider for dei ulike serveringsstadene. Vi har òg tilbod til allergikarar og vegetarianerar.

Aasmunds Kontantkort (Cashless)

Alle salspunkt på festivalområdet tek kun Cashless som betalingsmetode. Cashless-kortet kan ladast opp med både kontantar og kort, men vi ber om at du i så stor grad som mogleg nyttar kort for kjøp av bongar.

• Cashless er ei elektronisk betalingsløysning
• Alle transaksjoner er gratis, du blir berre belasta eit årlig gebyr på kr 50,-
• Du kan kjøpe og fylle opp kortet med det beløpet du ynskjer i Bongbue på festivalområdet
• Kortet brukast som betalingsmiddel på alle salspunkt
• Refundering av ubrukt beløp kan gjerast i Bongbue

Om du ikkje har eit Cashless-kort frå eit anna arrangement tidlegare i år, så får du utdelt kort ved fyrste opplading i Bongbua. Årsgebyret på kr 50,- vil då bli lagt til i transaksjonen.

Du kan sidan registrere kortet ditt på www.cashless.no . Innanfor gyldigheitsperioden kan du benytte kortet på alle arrangement i Noreg som har Cashless si betalingsløysing. Ynskjer du å fylle opp kortet eller få refunderte ubrukt beløp, kan du gjera dette i heile gyldigheitsperioda (fram til 31.12.2012). Hugs å gå til ein påfyllingsstasjon (Bongbua) og få ei refunderingskode før du reiser frå Vinjerock dersom du ynskjer å ta ut resterande beløp.

Camping

Alle med festivalpass har inkludert gratis overnatting i verdas mest idylliske festivalcamp like ved festivalområdet. Det vil bli rigga toalett i tilknyting til festivalcampane. Hugs at bålbrenning, eingongsgrillar og glasflasker er srengt forbode i festivalcampane! Festivalcampen er fysisk avgrensa, og det skal ikkje setjast opp telt utanfor desse grensene. Vi ber dykk respektere privatlivet til hytteeiagarne i nabolaget.

Det blir også i år rullestolvennlig camping ved sidan av Fondsbu, denne er kun for rørslehemma.

Bubil & campingvogn

Ynskjer du å ta med bubil eller campingvogn til Vinjerock blir det eigen camp på Tyinholmen, om lag 3 km frå Eidsbugarden. Det er mogleg å ta festivalbussen båe vegar. NB: Begrensa med plassar.

Førehandsbestilling kan du gjere hjå Tyinholmen, telefon 61 36 78 88      
Merk: Caravanplass er ikkje inkludert i festivalpass.

Sorter søpla di!

Posar til søppel får du på festivalbussen, i Serviceteltet og av vår vandrande miljøpatrulje. Desse har fargekodar:
Raudt = pant, grøn= matavfall, svart = restavfall og kvit = plast.
Søpla di kan du levere på ein av dei ti miljøstasjonane våre som du finn i campen, i Vinjeparken, utanfor informasjonsteltet og på festivalområdet. Miljøstasjonane er merka med grøne skilt!

Aktivitetar og turar

Veit du ikkje kvar du skal gå? Ynskjer du turtips? Stikk innom turinformasjonen til DNT i Vinjeparken og spør om råd!

Helse og tryggleik

På Vinjerock har vi eigen Vinjedoc (doktor). Skulle uhellet vera ute kan han lappe deg saman igjen, evt. sende deg vidare om sterkare lut må til. Sanitetsteltet er alltid bemanna med sanitetspersonell frå Røde Kors, sjukepleiarar og lege. I tillegg finn du helsestasjon for ungdom, politi og brannvesen i same området.

I tillegg til dette har vi alltid tryggleikspersonale som patruljerar området og passar på. For din eigen tryggleik tilrår vi:

• At du er varsam med å bade i elver og vatn (Bygdin, Tyin, andre blaute områder). Det er som oftast bikkjekaldt, kroppen kan få sjokk og du panikk. Vass heller uti til knes om du er varm (eller møkkete) og vask deg på grunt vatn!
• Ikkje bruk av eigen båt/kajakk/kano utan riktig opplæring og utstyr (hjelm, tørrdrakt, symjevest og trening).
• At du syter for å pakke med deg nok klede. Om du treng meir kan dette kjøpast på Intersport sitt utsal!
• Å ikkje fyre opp primus o.l. i inne i teltet. Teltbrann er stygge saker, og det ser me helst at du slepp å oppleve.
• Å ikkje tenne opp bål/grillar o.l. i campen. Dette er strengt forbode! Grille kan du gjere på fellesgrillane, og ellers har vi festivalmat til ein god pris i matteltet.

Tapt og funne

Har du funne noko som ikkje er ditt? Ta det med til serviceteltet og lever det her. Har du mista noko? Stikk innom det same serviceteltet og meld det sakna, eller høyr om det er komme til rette.

Nye informasjonsløysingar

Vi prøver stadig å forbetre oss med tanke på miljøet, og med det bestemte vi oss for å fjerne papirbaserte informasjonsløysingar og satse på meir miljøvenlege løysingar. Vi har kutta ut både festivalavis og festivalprogram, då det stor sett enda som søppel etter festivalen, men ikkje fortvil - gode alternativ ventar deg!

Infoskjermar

Det blir åtte infoskjermar plassert rundt på området der de kan finne informasjon om det meste som skjer og anna nyttig informasjon. Dersom infoskjermen ikkje «svarar» på det du lurer på kan du ta turen innom Serviceteltet og spørje dei hyggelege vertane våre der! 

Mobil info og ladestasjonar

Fordi vi baserar oss på digitale informasjonsløysingar har vi òg utvikla mobile nettsider som syter for informasjon «rett i lomma». Vi baserer oss på at du nyttar mobilen og difor set vi òg opp ladestasjonar i samarbeid med Vang Energiverk fleire stader på festivalområdet. 

Nettsida vår

Ta gjerne turen innom før du reiser og oppdatèr deg på siste nytt på nett - her finn du artistintervju, program og anna snacks det kan vera kjekt å ha lest i gjennom før du pakkar sekken og dreg.

Dersom noko framleis er uklart er det berre å sende oss ei melding på Facebook  eller e-post på post@vinjerock.no -  så skal vi svare deg så best vi kan.

Velkomen til fjells!